Um veðurlagið í Mykinesi

Veðurlagið í Mykinesi.

Tað er vert at hava í huga, at frá sjóvarmálanum og 200 m. upp er veðurlagið milt, "tempererað"; tað ger tann 10º C "heiti"havstreymur, Golfstreymur, sum alt árið rekur framvið Føroyum. Omanfyri 200 m. er arktiskt veðurlag. Í Mykinesi er sera harðbalið veður og er mangan verri enn í hinum oyggjunum ella í Europa.Veðrið er skiftandi og mangan broytist óvæntað og brádliga bæði á sumri og vetri. Veðrið kann vera heilt øðrvísi enn í hinum oyggjunum. Tann, ið ætlar sær út í Mykines, eigur tí at kunna seg um veðrið júst tann dagin. Mjørki kann vera bæði í Tórshavn og í Sørvági – meðan besta sólskinveður er í Mykinesi. Ein annan dag kann júst vera øvugt.

Mykines er brimpláss

Lendingin er opin móti havinum frá landsynningi suður um til vestan og sjálvt í fagrasta summarveðri kann verða ókyrt og ein kann undrast á, hví so er. Brádliga og uttan ávaring gerst ókyrt, skiftandi sama dag. Vindur, ætt, streymur við mysing, fjøra, flóð eru kendar ársøkir. Ættarskifti kann føra ókyrru við sær bæði vetur og summar. Mykinesfjørður er tiltikin fyri harðan streym, sum í mysing kann reka einar 9-10 míl (15-20 km./t). Tað er áhugavert at gera sær greitt, at í útsynning úr oynni, t.v.s rætningurin av Hólminum, er opið hav heilt yvir til Karibisku oyggjarnar, einar 4000 km. - meðan í landnyrðing er einki land, fyrr enn tú kemur til oyggjarnar í Barentshavinum, Franz Josefland og Novaya Semlya. Móti norðuri er nærmasti steðgur Norðpólurin (ella ísurin við pólin!) og í sunnan er opið suður í Antarktisk. Móti vestri er frítt og opið inntil suðureystur Grønland. Fyri eystan eru hinar oyggjarnar og handan tær Vest Kap í Noregi! Vissuliga liggja oyggjarnar frítt í Norðuratlantshavi og longst í vestri er Mykines.
Tað er sannlíkt, at ókyrra stendst av aldum frá ódnarveðri langt úti í Atlantshavi. Lágtrýst og vindur gera sítt til ókyrruna.
Alduforsøgnir eru at finna á DMI´s heimasíðu.

Brimið

Sum nevnt er Mykines brimpláss burturav. Á vetri er ókyrt í fleiri dagar, so ikki er komandi at lendigini við báti. Brimið kann verða øgiligt! Hólmsmegin brúnna er skráur betongmúrur stoyptur sum bylgjubrótari, sum forðar sjógvi og gróti at koma út á brúnna. Brúgvin er 27 m. uppi yvir vatnsskorpuni (í meðal). Í 1988 var ódn og girðingin úr jarni á brúnni boygnaði. Tann brúgvin lá hægri enn tann, sum nú er! Tá hendi eisini húsaskaði úti í Hólmi. Móti suðri er Hólmurin hella og hon fer undir í aldunum, tá nógv brim er. Tá høgættaódn er, er kyrt sunnanfyri, tí tað steyrrætta 200 m. høga bergið fyri norðan lívir væl tá. Vert er at vita, at flágirnar í Hólminum hava størsta hall í øllum oyggjum, sum tær stevna 16 stig í ein landsynning. Allur Hólmurin hevur hetta hallið frá eggini fyri norðan til helluna fyri sunnan. Myndir tiknar av brimi úti í Hólmi vísa froyðin fúka 70 m. upp í luftina.

Dømi kunnu síggjast á myndunum. Trýst á lítlu mynd fyri støddarøking.

	Á hesi mynd sæst froyðurin røkka 50 m. upp í loft. Brúgvin er 27 m. yvir havinum. Vinstrumegin sæst 32 m. høgi Píkarsdrangur . Pakkhúsið í Hólmi liggur 50 m. yvir havinum.
	Á hesi mynd sæst froyðurin mitt á myndini røkka 70 m. upp í loft. Hæddir annars sum áður nevndar. Vitameistarahúsini liggja 100 m. yvir havinum og vestan fyri froyðin.

Trýst her fyri at síggja fleiri myndir av brimi í Mykinesi.

Mykines skild frá umheiminu

Áðrenn tyrluflúgvingin kom í lag, kundi Mykines verða uttan samband við umheimin í langa tíð. Á vetri 1940/41 ella 1941/1942 kom postbáturin ikki út fyri lendingina í 92 dagar og tá gekk undan við margarini, melis og mjøli! (Bátur kom tá eina ferð undir oyggj (norðanfyri), men sera møðsamt var at koma niðan frá og heim við vøru). Í 1980-árunum var einki samband í 68 dagar.
Nú er slíkt farið í søguna, tí tyrluflúgving er alt árið. Fyri nøkrum árum síðani var veðrið so ringt, at sjálvt tyrlan kundi ikki flúgva í 10 dagar. Norðanættin hevur harðar hvirlur við sær, sum gera lendingarplássið hjá tyrluni ótrygt!

Veðurmátingar

Veðrið í Hólminum er bókført nú í 100 ár. Tað var partur av arbeiðnum hjá monnum, sum settir vórðu av "Fyr- og Vagervæsenet". Dagliga vórðu máld vindur, hiti, avfall, luftvæta og sjóvarhiti.
Til Københavns Universitet vórðu eisini send boð um norðlýsini.
Í dag eru mátingarnar sjálvvirkandi. Vindur verður máldur, tá hann er meiri enn 5 m./sek. í meðal. Hægsti og minsti hiti verða máldir seinastu 12 tímar saman við luftvætu og lufttrýsti. Hesar mátingar verða gjørdar 8 ferðir um samdøgnið og kunnu síggjast á DMI heimasíðuni.

Mátingar undir seinna heimsbardaga vístu avfall í Hólmi: 736 – 967 mm um árið. Hetta er minni enn aðrar mátingar í Føroyum. Sama tíðarskeið vórðu máldir 2252 0g 3232 mm við Strond norðanfyri Klaksvík.

Vindur, stormur, ódn í Mykinesi

Øll, ið lurta eftir veðurtíðindum, frætta um nógvan vind serliga á vetri í Mykinesi. Hólmurin hevur mangan hægstu vindmegina í Føroyum. Nú stendur vindmátarin ovast á vitanum og tí 125 m yvir havinum og 10 m. yvir hólminum. Men metingarnar eru tó galdandi fyri júst tað staðið, har tólið stendur! Jú, vindurin er nógvur í Mykinesi. Á sjónum er vindurin minni og javnari enn uppi við vitan og ikki eru so harðar hvirlur. Bæði í Hólmi og bygdini kunnu hvirlurnar bresta á við ógvusligari styrki. Vissuliga er nógvur vindur í Mykinesi.
Um ein ódn á Mykinesi (og Føroyar) tan Januar 2008 Sidste nyt fra Mykines.

Ymisk met

Í Hólmi var frostmet 2. apríl 1968, tá vóru 10 kuldastig. Kaldasta máting var fyri Føroyar eru 12,3 kuldastig á Vága floghavn tann 4. mars 2001.
Í Hólmi var vindferðin 50 km/sek. (180 km./t.) tann 7. mars 1997 og 15. januar 1999. Sama dag í mars var harðasta hvirlan 66,9 m./sek. (240 km./t). Ódn er, tá vindmegin er 12 mett eftir Beaufortstiganum, t.v.s. 32,7 m./sek., - og hann gongur ikki hægri enn til 12! Hugsa vit okkum hann "longdan", hevði mátingin verið18, men hon finst ikki! (Eina ferð boðaði Hólmur frá 16, men tá komu boð frá DMI , at 12 var hægst). Nú verður mált í m./sek., sum ikki hevur eitt ovara mark. Mátingarnar vísa, hvussu veðrið leikar í!
Í bygdini er vindurin ójavnur alt eftir, sum ættin er. Stormur kann vera í Hólmi, meðan bygdin liggur í læ. Landnyrðingurnorðan kann hava harðar hvirlur ði bygdini. Í Hòlmi er útnyrðingurvestan hvirluætt.
Tú kanst lesa um ódnina í Mykinesi (og Føroyum) 31 januar 2008 í Seinasta um Mykines (à Donskum).
Tá ódn leikar á í Mykinesi, kann tað koma fyri, at tann, ið vitjar, verður at liggja nátt hjá teimum, ið hann vitjar, tí ringt er at finna fótafesti uttanfyri og lívsvandi kann standast av at fara út fyri dyr.

Símun av Skarði sigur í tjóðarsongi okkara so væl frá hesum í regluni "á vetri so randhvítt"- Jákup Dahl, próstur, er beinrakin við sanginum: Havið sang yvir mær vøgguljoð, brimið meg ruraði í blund.